BAGUIO CITY – Kiniddaw ti ama ti Baguio ti panangnayon dagiti health officials ti siudad iti bilang dagiti isaysayangkatda a COVID test iti innaldaw.
Sigun kenni Mayor Benjamin Magalong, umuna a maipasidong iti COVID test dagiti indibidual a mapapati a karisguan iti nasao nga impeksion.
Kinunana nga apaman a mabigbig dagiti lugar a kaaduan ti kasona ket maipangruna dagitoy iti COVID test tapnu mabigbig ti kakaro ti impeksion, pakairamanan kadagiti asymptomatic carriers wenno dagiti saan a makitaan ti sintomas.
Innayonna a tapnu matungpal ti nasao nga istratehiya ket adda ti pagkasapulan para iti panakanayon ti rapid diagnostic tests manipud iti agdama a 200 tests ket mapagbalin a 400 tests iti innaldaw.
Kinuna ti mayor a nasken metlaeng a mapagbalin a 200 tests iti innaldaw ti Reverse Transcription Polymerase Chain Reaction (RT-PCR) tests.
Maibasar iti datus ni Mayor Magalong, adda ti agarup 3,000 nga available a rapid test kits ken dumanon 20,000 nga RT-PCR test kits a mabalin a maaramat kadagiti maisayangkat a napalawa a COVID-19 testing iti siudad.
Innayonna a manamnama a sumangpet iti siudad ti agarup 40,000 nga RT-PCR test kits manipud iti national task force on COVID-19 para iti panakanayon ti kapasidad ti Baguio General Hospital and Medical Center a maysa a sub-national testing laboratory para iti Northern Luzon.
