BAGUIO CITY – Saan pay a maibaga a ‘failed’ wenno napaay ti kaunaan nga antigen testing a maisaysayangkat ditoy siudad ti Baguio.
Sungbat daytoy ni Baguio City Administrator Engr. Bonifacio Dela Peña iti pannakiyuman ti Bombo Radyo kenkuana mainaig iti waragawag ni National Task Force (NTF) Against COVID-19 spokesman Restituto Padilla a napaay ti pilot study ti antigen testing ditoy Baguio.
Kinunana a manarimaan paylaeng ti panakaisayangkat ti antigen testing kadagiti turista a sumangsangbay ditoy siudad.
Dinakamatna nga iti kanito a malpasen ti pilot test ken mairuar ti resulta ken sadiay laeng a maibaga a napaay wenno epektibo ti nasao a COVID test.
Impettengna a nasapa unay ti panangtingitingda ti nasao a banag.
Imbinglay ni Dela Peña a puntirya ti lokal a gobierno a makaisayangkat ti 900 a test.
Dagus met a linawlawagan ti NTF against COVID-19 ti waragawag ni Padilla babaen iti maysa a waragawag a nangilanad a saan pay a nakompleto ti antigen pilot testing ditoy siudad ken ti dakdakamaten ni Padilla ket maysa nga antigen test kit brand.
