BAGUIO CITY – Manarimaan paylaeng ti imbestigasyon dagiti otoridad iti napasamak a pammaltog sadiay Barangay Mudeng, La Paz, Abra itay nabiit.
Immuna iti dayta, nabigbig ti biktima a ni Rommel Pisco Britos, 41-years old ken residente iti Barangay Dugong, Bucay, Abra.
Iti inisyal a report, nakalugan ti biktima iti maysa a motorsiklo a naggapu iti La Paz ken paturong sadiay Bangued.
Idi nakadanon daytoy sadiay Barangay Mudeng, killaat a pinaltogan ti saan a nabigbig a suspek iti saan nga ammo a rason.
Naitaray met ti biktima iti Abra Provincial Hospital ngem naideklara a ‘dead on arrival.’
Nagsagrap ni Britos iti tallo a tama ti paltog iti bukotna ken maatap a caliber 45 ti naaramat kas maibasar iti tallo a basyo a naala iti nakapasamakan ti insidente.
