BAGUIO CITY – Im-imbestigaran paylaeng dagiti pulis ti pakabigbigan ti nangpalpaltog iti uppat nga indibidual nga agkalkalap iti Nagurayan River sadiay Lower Atok, Flora, Apayao idi kanikadua.
Nabigbig dagiti biktima a da Richard Ignacio, 23-anyos; Demi Mamba, 32-anyos; Aldrin Cusit, 20-anyos ken ni Elmer Mendoza, 20-anyos, bin-ig a construction workers ken residente ti Poblacion West, Flora, Apayao.
Maibasar iti report, manarimaan ti panagkalap dagiti uppat iti Nagurayan River babaen iti homemade fishing gun.
Sigun kadagitoy, nakangngegda iti putok ti paltog ngem saanda nga inkankano ken intuloyda ti nagkalap.
Nupay kasta, kalpasan ti 30 a minutos ket killaat a pinalpaltogan ti saan pay a nabigbig a suspek dagitoy.
Natamaan ti kanigid a luppo ni Ignacio bayat a natamaan ti kanigid a gurong ni Mamba.
Natamaan met ti kanawan a takiag ken kanawan a barukong ni Cusit bayat a natamaan iti dua a bala ti kanawan nga ima ni Mendoza.
Dagus nga intaray dagiti pulis dagiti biktima iti pagagasan bayat a maan-anop ti suspek iti daytoy.
