--Ads--
BAGUIO CITY – Maan-anop ti suspek iti pammaltog iti maysa a local government employee sadiay Kalinga idi rabii ti Huwebes, October 10.
Nabigbig ti biktima a ni Jay Wacnagan, 47-anyos, naasawaan, empleyado ti lokal a gobyerno ti Tabuk City ken residente ti Balong, Tabuk City, Kalinga.
Sigun iti Kalinga PNP, im-imbestigaranda paylaeng ti nagduduma nga anggulo ken posible a rason iti nasao a pammaltog.
Naamuan a nakatugaw ti biktima iti sangwanan ti pagtaenganna idi killaat a napaltugan ti barukongna babaen iti saan pay a nabigbig a suspek.
Nangitunda daytoy iti dagus nga ipupusay ti biktima.
Umap-apela met dagiti pulis iti publiko nangruna kadagiti makaipaay iti impormasyon a mangitunda iti panakabigbig ken panakakemmeg ti suspek.
