BAGUIO CITY – Tubtubngaren dagiti sumagmamano nga asosasyon dagiti drivers ti parapubliko a lugan ditoy rehion Cordillera ti panggep ti National Inter-Agency Task Force a panakakissay ti distansia kadagiti parapubliko a lugan manipud sigud iti maysa a metro.
Iti panakiyuman ti Bombo Radyo, kinuna ni Patricio Evangelista, presidente ti Federation of Jeepney Operators and Drivers Association ditoy lokalidad a saan ladta a masurot ti 50% a kapasidad kadagiti parapubliko lugan iti laksid a maipababa ti physical distancing.
Inaklona nga idi paylaeng ket saanen a masursurot ti one-meter distance kadagiti parapubliko a lugan gaputa saan a pudno a maka-akomodar iti 50% a kapasidad dagiti parapubliko lugan babaen iti nasao a mekanismo.
Dinakamatna nga awan pay ti naawatda a pormal a pammilin manipud kadagiti maseknan nga ahensia ti gobierno isut gapuna a saanda pay a nangipatungpal iti adjustments kadagiti parapubliko a lugan.
Nupay kasta, kinuna ni Evangelista a nainget a sinurotda ti one-seat apart a pagalagadan dagiti pasahero babaen kadagiti dividers nga inmuntar dagiti drivers.
Kiniddawna pay kadagiti maseknan nga ahensia ti panangipaulogdan iti pudpudno a memorandum circular tapno saan a matikaw dagiti drivers dagiti parapubliko a lugan.
