BAGUIO CITY – Tarigagay ni Cabinet Officer for Regional Development and Security wenno CORDS for Cordillera ken Agriculture Secretary William Dar ti panakapapartak ti implementasyon ti Balik Probinsya, Bagong Pagasa Program ditoy rehion Cordillera.
Maipalagip nga idi pay kuma Mayo a naimplementar ti BP2 Program ngem naitantan gapu iti panagadu dagiti locally stranded individuals a nasken a matulongan iti panagawid iti pagtaenganda iti agdama a pandemya.
Sigun kenni Sec. Dar, puntirya ti Balik Probinsya, Bagong Pagasa Program a maipaayan iti gundaway a makasubli iti nagtaudan nga ili wenno agakar iti probinsia dagiti pamilya nga agnanaed kadagiti siudad.
Dinakamat met ni National Housing Authority OIC Architect Elizabeth Joseph a manarimaan ti panangberipikar ken panangipinalda iti listaan dagiti taga-Cordillera a benipisaryo ti Balik Probinsya, Bagong Pagasa Program.
Maibasar iti kaudian a datus, 527 a taga-Cordillera ti nagaplikar iti nasao a programa.
Mangbukel met ti Cordillera Regional Development Council iti regional and provincial implementing guidelines and procedures para iti Balik Probinsya, Bagong Pagasa Program ken agserbi a pilot areas ti Baguio City ken Benguet.
Inyunay-unay pay ni Sec. a kasapulan ti whole of nation approach iti implementasyon ti Balik Probinsya, Bagong Pagasa Program tapnu maipaayan dagiti benipisaryo iti napapateg a serbisyo manipud iti nagduduma nga ahensia ti gobyerno.
