BAGUIO CITY – Nagbalin a generally peaceful ti panakapasangbay ti baro a tawen ditoy rehion Cordillera malaksid laeng iti panakadangran ti dua nga indibidual gapu iti boga wenno can cannon.
Kagiddan iti daytoy, pinagyamanan ni Police Regional Office Cordillera regional director PBGen. R’Win Pagkalinawan dagiti umili ti Cordillera gapu iti panakikaykaysada iti apela a natalged a panakapasangbay ti baro a tawen.
Dinakamatna a sakbay pay ti holiday season ket nangisayangkat dagiti pulis iti rehion iti nasaknap nga information drive ken nainget nga implementasyon ti pammilin iti umno a panagaramat ti paputok ken dadduma a palibang.
Impannakkelna metlaeng nga agarup 1,200 a pulis ti naiwaras tapnu mangipasigurado iti natalged a panakapasungad ti baro a tawen ken kangrunaan a binantayan dagitoy dagiti kadawyan a pakaur-urnongan dagiti tattao.
Sigun pay kenni Gen. Pagkalinawan, awan ti firecracker-related injuries a nailista iti Cordilleras malaksid iti dua a nadangran gapu iti boga.
Imbinglayna a dagitoy ket 12-anyos a lalaki sadiay Paracelis, Mountain Province a nagsagrap ti dunor iti mata ken 34-anyos a lalaki sadiay Alfonso Lista, Ifugao a nagsagrap ti dunor iti tengnged.
Pagyamyamananna pay nga awan ti namonitorda nga iligal a panagpaputok kabayatan ti okasyon.
