BAGUIO CITY – Tuttutukan ken paspasayaaten ita ti baro a dadaulo ti Provincial Disaster Risk Reduction and Management Office (PDRRMO) ti Benguet ti sistema ti koordinasyon ken panagtinnulong dagiti munisipyo iti masakupan ti probinsia nangruna iti panawen ti kalamidad wenno saan a napintas a pasamak.
Iti panakiuman ti Bombo Radyo Baguio kenni Benguet PDRRM Officer Abner Lawangen, imbinglayna a babaen iti daytoy ket naannayas ken epektibo ti panangited ti tulong no adda dagiti mapasamak iti maysa a munisipyo.
Innayonna a nainget metten ti koordinasyonda kadagiti Municipal DRRM Offices ken Barangay DRRM Offices nangruna ta dagitoy ti kangrunaan ken kaunaan nga agresponde no adda ti mapasamak iti masakupan dagitoy.
Dinakamatna pay a nakasagana ken naka-alerton dagitoy iti posible nga epekto ti bagyo a Kiko iti Benguet malaksid pay nga agtultuloy ti panagwanawanda kadagiti nabigbig a lugar iti probinsia a narisgo iti panagreggaay.
