BAGUIO CITY – Adalen paylaeng ni sigud a PNP-CIDG chief ken ita ket Baguio City Mayor Benjamin Magalong no kasano a mapatibker ti security detail-na kasaruno dagiti maaw-awatna a death threats kalpasan dagiti imbutaktakna seknan kadagiti ninja cops.
Iti eksklusibo nga interview ti Bombo Radyo Baguio, kinuna ni Mayor Magalong nga addaan daytoy ti security detail.
Nupay kasta, impettengna a nangina ken saan a nalaka ti panagala ti kanayonan a security details gaputa agtaud iti bukodna a bulsa ti gastos no agala man iti kanayonan nga escorts.
Kinunana a saan met a mabalin a ti lokal a gobyerno ti Baguio ti aggastos para iti kanayonan nga escorts-na gaputa ti naawatna a pangta iti biag ket awanan koneksion iti trabahona kas mayor ti Baguio.
Innayonna a dagiti pangta iti biagna ket resulta dagiti imbutaktakna iti panagdengngeg ti Senado.
Immuna iti daytoy, inwaragawag ni Sen. Panfilo Lacson a mabalin a nayonan ti Senado ti escort ni Mayor Magalong no agdawat daytoy iti Senado.
Kinuna met ni Sen. Richard Gordon nga addan ti naipaay a security assistance iti pamilya ni Mayor Magalong.
