BAGUIO CITY – Linawlawagan ti dadaulo ti Department of Education (DepEd) iti rehion Cordillera a dry run ti maipatungpal a limited face-to-face class kadagiti napili a pagadalan iti rehion Cordillera a mangrugi inton Lunes, November 29.
Iti panakiuman ti Bombo Radyo Baguio, dinakamat ni DepEd-Cordillera Regional Director Estela Cariño a no awan ti tumaod a parikut ken agtalinaed nga adda iti Level 1 ken Level 2 dagiti LGU a mangsaksakop kadagitoy ket maituloy ti nasao a wagas ti panagadal.
Sigun kenkuana, maawatda paylaeng ti official approval ti limited face-to-face kadagiti 20 a parapubliko a pagadalan iti entero a rehion, pakairamanan ti komento ti Department of Health.
Inlawlawagna a 20 laeng a pagadalan iti rehion ti napilida para iti pilot test ti limited face-to-face class para kadagiti Kindergarten agingga Grade 3 ken iti Senior High School.
Sigun kenkuana, babaen iti daytoy ket matutukan ti kinatalged dagiti estudyante ken mannursuro iti implementasyon ti limited face-to-face class kadagiti nasao a pagadalan.
Masarakan dagitoy kadagiti sitio ken barangay nga awanan ti kaso ti COVID-19, impalubos ti nagannak ken lokal a gobyerno ti face-to-face class, addaan ti wash area, entry ken exit point dagiti estudyante ken nabakunaan dagiti mannursuro ken non-teaching staff.
Innayonna a bassit laeng ti learners dagiti nasao a pagadalan ken magudwa ti klase malaksid a 10 wenno 12 laeng ti maakomodar iti maysa a classroom ken magudwa ti klase nga agpaut laeng iti tallo nga oras.
Inyunay-unay ni Cariño a no awan ti pammalubos ti nagannak ket mabalin a saan a makipaset iti limited face-to-face class kadagiti napili a pagadalan ti maseknan nga estudyante.
Sigun pay kenkuana, dagiti nasao a tukad ti napalubusan iti limited face-to-face class gaputa awan unay ti kaso ti COVID-19 kadagiti ubbing a sumrek ti Kindergarten agingga Grade 3 bayat nga adda metten ti panagbakuna kontra iti COVID kadagiti senior high schools.
Kagiddan iti daytoy, aw-awisenna dagiti senior high schools iti panagpabakuna dagitoy kontra iti COVID-19.
