BAGUIO CITY – Naisubli ti pasalip para iti Cleanest and Greenest Barangay ditoy ti siudad ti Baguio.
Sigun kenni Mayor Mauricio Domogan, mangrugi nga agrikos iti nagduduma a babbarangay ti judging committee ti pasalip inton Abril.
Kinunana a karaman kadagiti basaran ti pasalip ket ti kinadalus ti waiting shed nga awanan ti graffiti wenno vandalism, presensia ti nagduduma a masitas kadagiti arubayan ti babbalay ken kalkalsada, nadalus a pagtaraknan ti baboy ken dadduma pay.
Nupay kasta, kinuna ti mayor a kangrunaan a pagbasaran ti judging committee ti panagtulnog dagiti bumarangay iti umno a panagibelleng iti basura.
Inyunay-unayna a saan laeng a ti mangabak a Cleanest and Greenest Barangay ti mairagawag no di ket agramanen ti Top 10 Dirtiest wenno karurugitan a barangay.
Innayonna pay a babaen iti nasao a pasalip ket maisubli iti siudad ti Baguio ti titulo daytoy kas Cleanest and Greenest Urbanized City.
