BAGUIO CITY – Inkalintegan ti City Environment and Parks Management Office (CEPMO) ti panangpukanda iti 188 a saleng iti masakopan ti GSIS area ditoy siudad ti Baguio.
Sigun kenni Cordelia Lacsamana, department head ti CEPMO, naipaayan iti permit ti panakaputed dagiti nasao a kayo gaputa natay ken infested dagitoy.
Inlawlawagna a ti inaramid dagitoy ket sanitation cutting gaputa nu saanda a puteden dagiti nasao a kayo ket posible a maapektaran iti infestation dagiti dadduma pay a kaykayo sadiay.
Innayuna nga iti panagadal nga insayangkat dagiti foresters ken technical experts a nagturong iti nasao a disso ket natakwatanda nga infected iti fungus ken bacteria dagiti nasao a kayo.
Impakaamo met ti nasao nga opisyal a ti engineering office ti mangbagkat kadagiti nasao a kayo tapnu mapuuran nangruna ta kas maibasar iti panagadal ket saan a mairekrekomendar a maaramat daytoy para iti panakaipasdek ti balay.
Inyunay-unayna pay a saan a mabalin a maaramat daytoy a pangsungrod a pangluto.
Kinunana pay a gapu iti daytoy ket maaramat dagiti nasao a kayo a pangluto kadagiti aspalto a maaramat para kadagiti kalsada
