BAGUIO CITY – Tarigagay ti Provincial Social Welfare Development Office (PSWDO) ti Benguet a maikkat wenno bumaba dagiti mapaspasamak a kaso ti panagabuso kadagiti ubbing iti probinsia.
Impeksa daytoy ni Juana Banawe, dadaulo ti nasao nga opisina kalpasan a nailistada ti 49 a kaso ti child abuse sadiay Benguet manipud Enero agingga Abril ti agdama a tawen.
Kinunana a ti nangato a bilang dagiti maab-abuso nga ubbing ti mangipakpakita iti saan a nasayaat a kasasaad ti kagimongan.
Maibasar iti rekord ti opisina, nailista ti Tuba ti kangatuan a kaso ti child abuse a sinaruno ti La Trinidad bayat a kaaduan a kita ti panagabuso kadagiti ubbing sadiay Benguet a nailista ket physical abuse wenno pisikal a panagdangran a sinaruno ti acts of lasciviousness.
Innayon pay ni Banawe nga agtultuloy met ti panangipaayda iti intervention programs kadagiti biktima.
