BAGUIO CITY – Mapagparparikutan ita ti panagkurang ti espasyo nga agbalin nga impounding area dagiti makumkumpiskar a colorum a lugan ditoy lokalidad.
Sigun kenni Land Transportation Office-Cordillera Regional Director Francis Ray Almora, napumpunon dagiti impounding areas ti ahensia a masarakan sadiay Pacdal, Baguio City.
Kinunana nga agrereklamo dagiti empleyado dagitoy kasaruno ti panangipawilda a mangitugotda iti bukodda a motorsiklo gapu iti kaawan dagiti mabalin dagitoy a pagparadaan.
Gapu iti dayta, kinunana a manamnama a mangipatungpalda iti kanayonan nga auction para iti panakai-dispose dagiti lugan kadagiti impounding areas.
Inlawlawagna met a dagiti maipasidong iti auction ket dagiti motorsiklo a saan a nasaksaka ti nasurok innem a bulan.
