BAGUIO CITY – Awan paylaeng ti pinal a desisyon ti lokal a gobierno ti La Trinidad, Benguet no maituloy wenno saan ti panakarambak ti Strawberry Festival ti munisipyo a naituding tunggal bulan ti Marso.
Sigun kenni Mayor Romeo Salda, gapu daytoy iti killaat a panakaipasidong ti Benguet iti Alert Level 3 gapu iti pangta ti Omicron variant ti COVID-19.
Kinunana a posible a makanselar ti pestibidad iti kanito a maobserbaran ti ad-adda a panagngato dagiti kaso ti COVID-19 a mailista sadiay La Trinidad.
Dinakamatna a no sumayaat ti sitwasyon ken bumaba ti kaso ti COVID-19 sadiay iti ngudo ti Pebrero ket mabalin a maituloy ti pestibidad ngem malimitaran laeng dagiti maisayangkat nga aktibidad.
Imbinglayna a napagnumuan ti lokal a konseho ti munisipyo a matuloy ti pestibidad ngem killaat a nagbaliw ti klasipikasyon ti probinsia.
Inyunay-unay met ti mayor a no saan a matuloy ti pestibidad ket maituloy latta ti panudsuran, ti thanksgiving ritual ti ili ngem malimitaran laeng dagiti mabalin a dumar-ay.
Iti kanito a saan a matuloy ti Strawberry Festival ti La Trinidad para ita a tawen ket daytoy ti maikatlo a tawen a saan a marambakan ti pestibidad gapu iti agdama a pandemya.
