BAGUIO CITY – Agtultuloy ti imbestigasyon dagiti otoridad iti pakabigbigan dagiti dua a suspek a nangrames iti maysa a babai sadiay Purok 1, Pucsusan Barangay, Baguio City idi Martes, December 31, 2019.
Maibasar iti imbestigasyon, agmaymaysa ti 46-anyos a biktima iti pagtaengan dagitoy ken manarimaan ti panagkupinna kadagiti badbado iti salas.
Killaat a simrek dagiti dua a saan a nabigbig a nakasuot iti maskara ken kallugong babaen iti ridaw iti likud ti balay ken dagusda a tinutukan ti biktima iti paltog.
Inkagumaan ti biktima nga alaen ti cellphone-na a nakakabil iti lamisaan tapnu agpaarayat ngem linapdan daytoy ti maysa kadagiti suspek.
Imbilin ti nasao a suspek ti panagturong ti biktima iti silidna ken sadiay a rinames ti nasao a suspek ti biktima bayat a nagserbi a lookout ti maysa pay a suspek.
Kalpasanna ket imbilin dagiti suspek ti panangi-lock ti biktima iti ridaw sakbay dagitoy a pimmanaw.
Dagus met a nagreport ti biktima iti istasyon ti pulisya.
