BAGUIO CITY – Ituloy latta ti Social Security System (SSS) ti mangsalwad iti karbengan ti tunggal trabahador iti social security tapnu pagnumaranda dagiti benipisyo ken pautang nga ipapaay ti ahensia.
Inkari daytoy ni SSS President ken CEO Aurora Ignacio kagiddan ti panagyamanna iti Baguio Regional Trial Court (RTC) Branch 7, iti pulisya ken National Bureau of Investigation gapu iti agtultuloy a panagsuportarda kadgiti programa ti SSS tapnu magarantiyaan a maiserbi ti hustisya kadagiti aglablabsing iti Social Security Law.
Kasaruno daytoy ti panangkemmeg dagiti otoridad iti dua nga employers a nakumbiktar iti saan a panagtungpal iti Social Security Law iti nagsina nga operasyon kadagiti napalpalabas a bulan.
Binigbig ti SSS-Baguio dagitoy a da Antonio Perlas, agtagikua iti Red Lion Pub a nakemmeg sadiay Tuding, Itogon, Benguet idi July 31 ken Larry Ferrer, agtagikua ti Ads Central a nakemmeg sadiay Alaminos, Pangasinan idi August 26.
Iti rekord ti SSS-Baguio, kinumbiktar ti Baguio RTC Branch 7 ni Perlas idi October 30, 2019 gapu iti panaglabsingna iti Social Security Law ken nabigbig daytoy kas most wanted employer in Luzon North 1 Division ti SSS.
Gapu daytoy iti panakapaay ni Perlas a mangipaay kadagiti rekords ti empleyadona iti SSS, mangikissay iti employee’s share of contributions manipud iti employees’ compensations, mangbayad iti employer’s share of contributions ken mangisumitir iti nasao a kontribusyon iti SSS.
Nakedngan a mabalud daytoy iti innem a tawen ken naibilin ti panangbayadna iti obligasyonna a dumanon iti nasurok P16.8-M.
Napaay daytoy nga agparang iti naudi a panakatingiting ti kasona a nagresulta iti panakaipaylog ti warrant of arrest-na.
Kabayatanna, naibasura met ti kaso ni Ferrer idi August 19, 2015 gapu iti karina a installment a panangbayadna kadagiti kontribusyon dagiti empleyadona iti SSS ngem napaay daytoy, pakairamanan ti multa iti late payments.
Gapu iti daytoy, nabiag manen ti kaso kontra kenkuana idi January 27, 2017 ken naituloy ti panakatingiting ti kasona nupay ‘at large’ daytoy.
Nailanad met iti desisyon ti Baguio RTC Branch 7 idi May 21, 2020 a guilty ni Ferrer iti panaglabsing iti SS Law ken nakedngan a maibalud iti innem a tawen ken maysa nga aldaw agingga iti walo a tawen ken naibilin ti panangbayadna iti onligasyonna iti SSS a nasurok P40,000 ken ti three percent monthly interest a naurnong manipud August 19, 2015.
Gapu iti daytoy, inyunay-unay ni Ignacio ti mensaheda kadagiti amin nga employers nga aniaman a panaglabsing iti SS Law ket addaan ti katukad a pannusa.
Al-allukuyenda met dagiti addaan ti reklamo iti non-remittance, non-reporting ken dadduma a pakaseknan iti employer-da tapnu ireportda dagitoy iti opisina ti SSS nga asideg iti business address ti employer dagitoy.
