BAGUIO CITY – Bassit laeng dagiti turista a nagturong ditoy Baguio kalpasan ti dua a lawas a panakaiparit ti leisure travel paturong ditoy siudad.
Iti panakiuman ti Bombo Radyo Baguio, imbinglay ni City Tourism Officer Engr. Alec Mapalo a manipud Agosto 16 agingga Agosto 22 ket 130 a turista ti napalubusan a makastrek iti siudad.
Kinunana a dagitoy dagiti nagtungpal iti nainget a pagalagadan ti siudad kas iti panangiparangda iti negatibo a resulta ti RT-PCR test a naala iti uneg ti 72 nga oras sakbay ti panagbiaheda paturong iti siudad wenno saan ket ti vaccination card dagiti fully vaccinated.
Inaklonna nga adda met dagiti turista a naggandat a sumrek iti siudad a saan a maka-ammo kadagiti baro a pagalagadan ngem napasubli dagitoy gapu iti kinakurang dagiti dokumentoda.
Dinakamatna nga awan pay dagiti turista manipud kadagiti lugar a naipasidong iti ECQ, Modified ECQ ken GCQ with heightened restrictions kas iti NCR ken adu a probinsia iti aglawlaw daytoy a napalubusan a makastrek iti siudad.
Gapu iti daytoy, kinuna ni Engr. Mapalo a nagduduman ti istratehiya ti tourism sector iti siudad tapnu maital-o ti produkto dagitoy kadagiti umili kas iti panangidiaya ti staycation wenno promo kadagiti hotels, diskwento kadagiti produkto ken dadduma pay.
Sigun kenkuana, makatulong dagiti nasao nga addang tapnu maituloy ti panaggaraw ti ekonomiya a naapektaran iti agdama a pandemya.
Mangnamnamada met nga iti ngudo ti agdama a tawen ket ad-adda a sumayaat ti sitwasyon tapnu maipalubos ti panagturong ditoy siudad ti ad-adu pay a turista.
