BAGUIO CITY – Agtultuloy ti panagrikus ti lokal a gobyerno ti Baguio City kadagiti nabigbig a mega vaccination sites ti siudad tapno maipasigurado nga agtultulnog dagiti indibibidual kadagiti pagalagadan kabayatan ti vaccination program.
Kasaruno daytoy ti waragawag ti nasyonal a gobyerno a maiwarasan iti bakuna dagiti innem a lugar a nabigbig kas high risk area pakairamanan ti siudad.
Iti panakiuman ti Bombo Radyo Baguio, kinuna ni City Administrator Engr. Bonifacio Dela Peña a sumangpet ditoy siudad ti 36,000 a doses ti Pfizer vaccine iti sumaruno a bulan para kadagiti 18,000 nga indibidual.
Dinakamatna a puntiryada a mabakunaan ti 60% a populasyon ti siudad partikular dagiti agtawen iti 18 nga agpangato ngem tarigagayda a gun-oden ti 100% babaen iti panangimprobarda iti vaccination plan.
Impettengna nga innem agingga pito gasut laeng tunggal vaccination site ti bilang dagiti mabakbakunaan iti inaldaw gaputa nasken a dumalan paylaeng dagitoy iti interview.
Gapu iti daytoy, impaganetget ni Dela Peña a maikkaten ti nasao a proseso tapno mapapartak ken makabakuna iti lima ribu nga indibidual iti inaldaw.
