Agtultuloy ti panakatarimaan ken upgrading dagiti pasilidad iti Baguio Athletic Bowl complex.
Iti panakiuman ti Bombo Radyo kenni Gaudencio “Gudz” Gonzales, City Sports & Development Officer, naituding a matarimaan ti bleachers ti swimming pool ken ti track oval; panaka-restore ti diving pool kas warm-up pool; panakaimuntar ti wall climbing, recreational park, parking lot ken daduma pay.
Sigun kenni Gonzales, manamnama nga agbalin nga alternatibo a pag-ensayoan dagiti atleta ti Melvin Jones ken ti Wangal Sports Complex apaman a maiparikep ti nasao a pasilidad para iti panakatarimaan daytoy.
Innayona nga agtultuloy ladta ti panakaipatungpal dagiti torneo iti nasao a lugar ngem nasken ti internal arrangement nu sadino mausar laeng daytoy kadagiti official tournament ken saan a karaman ti trainings.
Kabayatanna, umad-adu ti bilang dagiti mangpangpanggep nga agadal ti swimming nangruna ket bakasyon dagiti estudyante ngem naiyunay-unay a nasken a masurot ti eskedyul ti panagaramat iti swimming pool.
Ti eskedyul dagiti atleta ket alas singko agingga alas ocho ti agsapa ken alas tres agingga alas sais ti malem bayat a dagiti walk-in ket alas ocho ti agsapa agingga alas tres ti malem.//Bombo Mera Pacpacan