BAGUIO CITY – Awan ti ordinansa ti Baguio a mabalin a pagbasaran dagiti barangay officials iti panangtiliw dagitoy kadagiti unvaccinated a rumwar kadagiti pagtaenganda.
Inyunay-unay daytoy ni Benjamin Macadangdang, Assistant Executive Secretary iti Barangay Affairs Office ti Baguio kasaruno ti pammilin ni Presidente Rodrigo Duterte a panangtiliw dagiti barangay officials kadagiti umili a saan a nabakunaan a mangipapilit a rumwar kadagiti babbalayda.
Iti interview ti Bombo Radyo Baguio, kinunana a makatulong met ti waragawag ti presidente tapnu maallukoy dagiti saan pay a nabakunaan nga umili tapnu agpabakuna dagitoy kontra iti COVID-19 ken iti panagtalinaedda laengen iti pagtaenganda no talaga nga agkedkedda nga agpabakuna.
Dinakamatna a mabalin nga agaramid ti barangay iti ordinansa kas panagtungpal iti pammilin ti presidente ngem magna metlaeng daytoy iti public consultation ken iti approval ti City Council isut gapuna a napimpintas no ti mangbukel iti nasao nga ordinansa ket ti mismo a City Council.
Impettengna a saan a mabalin a tiliwen dagiti barangay officials dagiti unvaccinated a rumwar iti pagtaengan dagitoy gaputa dagiti opisyales met ti mabalin a maireklamo iti abuse of authority, illegal detention ken gross ignorance of the law.
Nupay kasta, kinunana nga agtultuloy ti panangawis ti lokal a gobyerno kadagiti saan pay a nagpabakuna iti panagpabakuna dagitoy kontra iti COVID-19.
Inaklonna pay nga adda dagiti barangay iti siudad a saan a nakaragpat iti 100% a vaccination rate gapu iti panagkedked ti sumagmamano nga umili kadagitoy.
