Naangay ti seremonya ti panaguram ti daan a watawat ti Pilipinas kagiddan ti panaglagip iti National Flag Day inton bigat, Mayo baente otso.
Indauluan daytoy ni Baguio City Mayor Benjamin Magalong ken ti Boy Scout ken Girl Scout of the Philippines idiay City Hall Grounds ita nga agsapa.
Sakbay a nauram ti watawat ti Pilipinas, naisayangkat ti programa nu sadino naipalagip ti pakasaritaan, kinapateg ken simbolismo iti daytoy.
Naipalagip a ti watawat ti sagisag ti inang bayan, isu’t mangibagi iti napalabas, agdama ken iti masakbayan ti pagilian ken pangipangarangarang daytoy iti nabaknang a kultura ti pagilian a Pilipinas.
Kalpasan ti programa, naangay ti seremonya ti panaguram iti daan a watawat.
Ti abo manipod iti nauram a watawat ket naipan iti urn, ken naikali iti city hall grounds ti siudad ti Baguio.
Daytoy a seremonya ket paset ti tradisyon nga usto ken umno a pannakadispose kadagiti daan a watawat gapu ta maipawil a maibelleng dagitoy.//Bombo Jez Lapizar
