BAGUIO CITY – Inirtengan pay ti siudad ti Baguio ti kampanya para iti Earth Hour a maangay intun Marso 25 ti 8:30 agingga iti 9:30 ti rabii sadiay Baguio City Hall.
Sigun kenni Cordelia Lacsama, dadaulo ti City Environment and Parks Management Office, daytoyen ti maikapat a tawen a ramrambakan ti siudad ti Earth Hour ngem ti laeng naidumaanna ita ket nairtengan ti panangikampanyada iti aktibidad.
Kinunana a nagbalin metlaeng daytoy nga awareness campaign ken saan laeng a dagiti silaw kadagiti parke ken street lights ti puntiryada a maiddep ita ngem ketdi, uray pay ti panakaiddep dagiti non-essential lights.
Nagsuratda metten kadagiti babbarangay ti siudad para iti panangobserbar met dagiti bumarangay iti Earth Hour nangruna ta maysa laeng daytoy nga oras tapnu makasalimetmetda iti kuryente.