Makidkidaw ti panakitinulong dagiti residente kas panagsagana iti manamnama a paniempo ti La Niña iti siudad ti Baguio.
Iti panakiuman ti Bombo Radyo kenni Boying Cominga, kapitan ti Barangay Lower Rock Quarry, kasapulan ti panakikaykaysa dagiti maseknan para iti panagdalus iti aglawlaw nangruna kadagiti drainage canal tapno saanen a mapasamak pay ti panaglayos apaman a mapasaran ti napigsa a panagbaykabak ti tudo.
Nupay kasta, kinuna ni Cominga nga iti agdama ket mangipatpatungpal dagitoy iti clean-up drive tunggal lawas babaen iti panakikoordinarda kadagiti nagduduma a kapitan iti siudad nu kasano a risuten ti pakaseknan maipapan iti basura ken ti panangipatungpal ti information dissemination kadagiti residente para iti panagsegregate ti basura ken ti panagsurot iti naituding nga aldaw ti panagbabasura.
Sigun kenni Cominga, dakkel a pakaseknan ti nasao a barangay ti basura isut gapu na a mapangpanggep ti panakarehabilitate ken panakatarimaan manen dagiti screen a naikabil iti kanal a mangsagsagat kadagiti basura.
Kabayatanna, kinuna ni Cominga a saanen a mabalin a pagparadaan iti City Camp Lagoon kasaruno daytoy ti napasaran a panaglayos idi napalabas a bulan.
Kinuna pay ti kapitan a mabalin laeng nga agparada dagiti lugan nu addaan ti distansya a 50 meter radius.
