BAGUIO CITY – Agtultuloy ti panang-anop dagiti pulis kadagiti nailista a Top Most Wanted Persons ditoy siudad ti Baguio.
Sigun kenni PSupt. Johnson Abellera, dadaulo ti City Investigation and Detection Management Unit ti Baguio City PNP, kaaduan kadagiti kaso dagiti wanted persons ditoy siudad ket murder, frustrated murder, homicide, rape ken daduma pay a nadadagsen a kaso.
Kinunana a karaman kadagiti nasao a wanted persons ni Marites Judan a sumangsango iti a robbery with homicide gapu iti panagpapatayna iti maysa nga ubing sadiay Pinsao Pilot.
Dinakamatna nga agturturong metlaeng dagitoy iti sabali a lugar tapnu tuntunenda dagiti wanted personalities a nailista iti syudad a nagkamang wenno aglemlemmeng kadagiti nasao a lugar.
Innayonna a no mamingsan ket saan tubo ti siudad ti Baguio dagiti nailistada a wanted person isut gapuna a maysa daytoy kadagiti rason no apay a marigatanda a mangsapol kadagiti suspek.
Inaklonna a makikokoordinarda met laeng kadagiti dadduma nga unit ti pulisya para iti dagus a panakakemmeg dagiti suspek kas iti panakatiliw ti Number 9 Top Most Wanted Person iti regional level a sumangsango iti kaso a rape a kinnemmeg ti nagtipon nga operatiba ti Baguio City PNP ken Mt. Province PNP.
