BAGUIO CITY – Pinaglibakan ti grupo a Mayor Rodrigo Roa Duterte-National Executive Coordinating Committee (MRRD-NECC) – Cordillera Chapter ti alegasyon a peke wenno scammer ti grupoda.
Iti eksklusibo a panakiyuman ti Bombo Radyo-Baguio kenni Rex Bayangan, pannakangiwat ti MRRD-NECC – Cordillera, kinunana a lehitimo ti grupoda ken saanda nga ar-aramaten laeng ti nagan ni Presidente Rodrigo Duterte.
Nagbalin a pammalawag daytoy ti grupo kalpasan a maak-akusaran dagitoy gaputa saan a natuloy ti panagparang ni Pres. Duterte ditoy lokalidad kalpasan nga inawis daytoy ti grupo.
Inlawlawag ni Bayangan a saan a nagparang ti presidente iti maysa nga aktibidad ditoy lokalidad gapu iti napateg nga inaramid daytoy ngem nangipatulod ti presidente iti pannakabagina a timmabuno iti aktibidad.
Impettengna nga aprobado ti presidente ti grupo nga MRRD-NECC ken agserserbi ni Agrarian Reform Secretary John Castriciones kas presidente ti grupo.
Panakaisakad ti federalismo
Kabayatanna, tinakderanna nga ituloy ti grupoda ti information education campaign dagitoy iti nagduduma a paset ti Cordillera para iti maisaksakad a federalismo.
Kinunana nga ad-adda a supsuportaran ti grupoda ti federal a sistema a gobyerno no idilig iti otonomiya para iti rehiyon Cordillera.
Inaklonna met a saan a suportado ti grupoda ti panggep a panagbalin ti Cordillera kas Autonomous Region.
Inlawlawagna nga ad-adu dagiti pagsayaatan nga itunda ti federal a gobyerno no idilig iti otonomiya.
Aw-awisen pay ni Bayangan dagiti umili iti rehion a makipaset iti federalism summit nga isayangkat ti grupoda inton Hulyo 15.
