BAGUIO CITY – Impetteng ti Benguet Federation of Small-Scale Miners a normal nga adda dagiti stakeholders a mangtubngar iti maisaksakad a Minahang Bayan nangruna no maapektaran ti lote dagitoy kas iti Benguet Corporation sadiay Itogon, Benguet.
Nagbalin a reaksion daytoy ni Engr. Lomino Kaniteng, presidente ti nasao a federasyon kalpasan a nangiruar ti nasao a korporasyon iti paka-ammo seknan iti panangtubngarda iti aplikasyon ti Itogon iti Minahang Bayan.
Nailanad iti paka-ammo nga adda dagiti naaplikaran iti Minahang Bayan a saksakupen met ti mining claims ti korporasyon.
Sigun kenni Kaniteng, no saan a pabor ti korporasyon iti aplikasyonda ket agisumitirda iti reklamo iti Provincial Mining Regulatory Board tapnu mapagsaritaan ti pakaseknan.
Nupay kasta, impettengna a legal ti panangaplikarda iti nasurok 2,500 hectares a lote para iti Minahang Bayan gaputa naibasura met ti mining claims ti korporasyon iti daytoy.
Kinunana a namindua a nagaplikar ti korporasyon iti mining claims iti nasao a lote ngem naibasura ti aplikasyon dagitoy para iti applications for mineral production sharing idi 2011 ken 2016.
Innayonna a ti napateg ket dakkel ti suporta ti provincial government ti Benguet ken ti Mines and Geosciences Bureau iti aplikasyonda para iti Minahang Bayan iti probinsia.
