BAGUIO CITY – Mangnamnama ti Baguio City Sports and Development Office nga aprubaran ti Inter-Agency Task Force (IATF) dagiti inrekomendarda nga sports competitions ditoy siudad ti Baguio a naituding a mairugi intun sumaruno a bulan.
Sigun kenni City Sports Development Officer Gaudencio Gonzales, lima a fun games ti inlistada kas maibasar iti pagalagadan ti IATF para kadagiti sports activities a mabalinen a mailukat iti publiko.
Kinunana a dagitoy ket ti fun golf tournament, e-scooter challenge, mountain bike fun trail ride, Pony Boyz Parlor Games, uphill fun bike ken ti e-games.
Inlawlawagna a dakkel dagitoy a tulong iti in-inot a panaglukat dagiti nagduduma a klase ti ay-ayam a makaipaay iti kanayunan a pisikal ken mental nga aktibidad para kadagiti mangbukbukel iti sports sector a nabayag a napupok kadagiti babbalay dagitoy gapu kadagiti community restrictions nga intunda ti agdama a pandemya.
Innayonna a dagiti nasao a fun games ket maipatungpal iti nagduduma a petsa ken paset dagitoy iti maika-111 a Baguio City Charter Day. (report ni Bombo Jordan Tablac)
