BAGUIO CITY- Maururay pay laeng ti desisyon ti korte nu maaprobaran ti 17 nga aldaw nga extension ti Temporary Restraining Order (TRO) a kiddaw dagiti residente nga apektado iti demolition a naipatungpal idiay Naguilian Road, Quezon Hill Proper, Baguio City idi Lunes.
Posible a maamwan pay laeng ti desisyon ti judge inton bigat, Hunyo 18.
Manamnama nga agleppas inton bigat ti 72 hours TRO nga immunan a napatgan.
Iti pannakiuman ti media iti maysa kadagiti apektado a residente, mangnamnama dagitoy a mapalubosan ti extension ti TRO tapno maitantan pay laeng ti demolition.
Sigun kenkuana, tawen 1990 kalpasan iti gingined idi naamammo ti nagannak na ti agnagan ti Lara, dadaulo ti urban poor no sadino naipaay ti lote kenkuana kas tulong.
Gapu iti dayta, nangipasdek dagitoy iti balayda.
Sigun kenkuana, saanda ammo a titulado ken adda ti dadduma nga akintagikua iti nasao a lote gapu ta ti ammoda, nagapo daytoy iti gobyerno.
Kabayatanna, imbinglay pay ti nasao a residente a saan laeng nga ita nga adda ti naawatda a demolition order ngem impagarupda idi un-una nga awan ti akintagikua iti nasao a lote gapu ta saan a ti akintagikua ti nangited iti demolition order kadakuada nu di ket ti former barangay chairman ti nasao a barangay.
Kagiddan dayta, pinaglibakanna ti insawang ti City Buildings and Architecture Office – Baguio City nga awan pulos ti innaramidda a wagas tapno masapulan ti akin tagikua ti lote wenno masolbar ti issue dagitoy.
Impetteng ti nasao a residente a nakauman ti media a namin adun a darasda a sinapsapol ti akintagikua iti nasao a lote.
Inlawlawag ni Atty. Nicasio Aliping, Jr., mangitaktakder kadagiti residente, dua laeng nga issue ti pagrikusan ti kaso: umuna, nu kukuada ti lote ken nu uk-ukoparenda ti lote ti sabali wenno paset ti road right of way.
Kabayatanna, dumanon met ti 750 sqm ti nasao a lote a tagikua ti agnagan iti maysa a ‘Gregory Lim’ sigun iti impormasyon manipud iti sabali a partido.
Impeksa met ni Atty. Aliping, Jr. a padasen dagitoy a makitungtong iti makintagikua iti lote nu mabalin a gatangen laengen dagiti residente ti lote iti negotiable ken ‘friendly price’.
Dumanon metten iti 21 a pamilya ti apektado gapu iti nasao a demolition no sadinno dagitoy ket agpapada nga agbay-bayad ti buwis. //Bombo Noveh Organo
This is a developing story . . .
