Sinungbatan ti Malakanyang ti kinuna ni Vice President Sara Duterte seknan iti dumakdakkel nga utang ti Pilipinas.
Iti maysa a rally idiay Australia, kinuwestunar ni Vice President Sara ti nasurok 16 trilion nga utang ti Pilipinas ken kinunana a saan a marikna ti publiko no sadino ti napanan ti utang.
Sigun kenni Palace Press Officer Claire Castro, saan laeng nga iti agdama nga administrasion ti nagtaudan ti nasao nga utang.
Kinunana a sipud pay June 2022 sakbay nga agtugaw ni President Ferdinand Marcos Jr. iti puesto, dumanonen iti 12.79 trilion ti utang a pinanawan ti administrasion ni Duterte.
Dinakamatna a dumanon iti 6.83 trilion ti inutang iti panawen ni sigud a President Rodrigo Duterte, katukad ti 115.1% a panangngato nu idilig kadagiti immuna nga administrasion.
Sigun iti Palasyo, ar-aramiden ti gobierno ti kabaelanna tapno maliklikan ti panagutang babaen iti panangpapigsa iti ekonomiya ken nasayaat a panagkolektar iti buis.
Nupay kasta, inaklon ni Castro nga adda dagiti gundaway a kas ti panawen ti krisis a saan a maliklikan nga agkasapulan ti kanayunan a pondo ti gobierno.