BAGUIO CITY – Nainget a konkondenaren ti Armed Forces of the Philippines ti pammotboteng nga inaramid dagiti kameng ti New Peoples Army kadagiti manursuro ti primary school sadiay Sitio Tebe, Barangay Namal, Asipulo, Ifugao.
Segun kenni Lt. Col. Nicolas Quemado Jr., commanding officer ti 54th Infantry Battalion, kalpasan ti panangraut ti militar iti kuta dagiti kameng ti Nona del Rosario Command ti Ilocos-Cordillera Regional Committee ket imbaw-ing dagiti rebelde ti atensyonda kadagiti sibilyan.
Kinunana a gapu iti insidente ket nasuspendir ti klase iti nasao a lugar.
Impetteng ti opisyal a maysa daytoy a wagas dagiti rebelde tapnu maibaw-ing iti sabli ti atensyon dagiti soldado manipud iti isaysayangkatda nga operasyon.
Nagpanawagan met ni Quemado kadagiti rebelde a saanda nga iraman dagiti sibilyan ken ibabada ti armasda ket agsublidan iti gobyerno.
