[photo credit to the owner]
BAGUIO CITY – Inreklamo ti maysa a pamilya ti turista ti panangdangran iti anakda ti nalatak nga aso a para iti picture taking sadiay Wright Park, ditoy siudad ti Baguio idi kalman.
Nabigbig ti nasao nga ubing a ni Macaiah Khloe Pungtilan, 9-anyos, estudyante ken residente dagitoy ti Batac, Ilocos Norte.
Maibasar iti report, iniggeman ti ubing ti nasao nga aso ngem dinarup daytoy ti ayop a nangitunda tapnu magasgas ti barukong ken ti kanigid a saka daytoy.
Sigun met kenni Joel Castillo, ama ti nasao nga ubing, kinatongtongda ni Wilbert Ampal a handler ti nasao nga aso ken ditoy nga inkari ti handler a daytoy ti manggastos iti panagpataming ti ubing.
Gapu iti daytoy, insingasing ni Castillo ti panakaimuntar ti kanayonan a security measures, safety precautions ken ti kaadda ti first aid iti nasao a disso iti kanito nga adda manen ti mapasamak a kapada nga insidente.
Kabayatanna, impanamnama ni Councilor Elmer Datuin, chair ti Committee on Tourism iti City Council a makitaripnongda kadagiti indibidual a mangididiaya iti aso para iti picture-taking kadagiti parke para iti panakabukel ti regulasyon dagitoy.
Kinunana a sukimatenda met laeng no adda iti kaskenan a permit dagiti nasao a kita ti negosyo tapnu adda iti naan-anay a responsibilidad dagiti akinkukua no adda iti dangran ti aso dagitoy.
Innayonna a kadagiti napalpalabas a tawen ket naipasardeng ti nasao a kita ti negosyo ngem gapu iti kiddaw dagiti maseknan ket naipalubos agingga iti agdama.
