BAGUIO CITY – Immandato itan ti lokal a gobyerno ti Baguio ti panangikabil dagiti establishimento ditoy siudad ti sticker wenno ribbon iti uniporme dagiti empleyado dagitoy kas pammaneknek a naan-anayen a nabakunaanda kontra iti COVID-19.
Sigun iti mayor, addang daytoy ti lokal a gobyerno tapno maguyugoy ti panagturong dagiti kustomer kadagiti nasao nga establishimento.
Kinunana a babaen pay iti nasao nga addang ket maipasigurado a natalged dagiti kustomer nga agturong kadagiti nasao nga establishimento.
Kabayatanna, napalubosan metten ti panagturong dagiti menor de edad kadagiti al fresco dining ken open spaces ditoy siudad.
Dinakamat ni City Tourism Officer Engr. Alec Mapalo a manaynayon ti bilang dagiti establishimento nga agap-aplikar ken maipapaayan ti Safety Seal a dumanon ita iti naurok ti 350.
Kasaruno daytoy ti pagalagadan nga impaulog ti lokal a gobyerno a dagiti laeng accomodation establishements nga addaan ti Safety Seal ken nagparehistro iti visita.baguio.gov.ph ti mabalin a pagdagusan dagiti turista.
Ti safety seal ket pammaneknek a dimmalan dagiti establishimento iti inspeksion dagiti maseknan nga ahensia a mangipaspasigurado a natalged dagitoy a turongen dagiti kustomer.
Immuna metten nga impanamnama ti Hotel and Restaurant Association of Baguio a nakasaganan ti tourism industry a mang-akomodar kadagiti fully vaccinated a turista kalpasan a nabakunaan ti 5,000 a tourism workers ti siudad itay laeng nabiit.
