BAGUIO CITY – Innaldaw a mareprepaso ken mabalbaliwan dagiti protocols ken contingency plan ti lokal a gobyerno ti Baguio kontra iti COVID-19.
Imbinglay daytoy ni City Administrator Engr. Bonifacio Dela Peña iti panakiuman ti Bombo Radyo Baguio kagiddan ti panangipannakkelna a kabaelan latta ti lokal a gobyerno a maimaton ti agdama a sitwasyon ti siudad gapu iti COVID-19 nangruna ta ninamnamadan ti panagado ti kaso ti nasao a sakit ditoy lokalidad.
Sigun kenkuana, maibaga a ti panagadu ti kaso ti COVID iti siudad ket konektado iti Delta variant a nakastreken ditoy Baguio.
Dinakamatna nga agtultuloy ti panakanayon dagiti bed capacity dagiti isolation centers ti Baguio.
Nupay napunnon dagiti pagagasan iti siudad ken naglimitarda ti awatenda a pasyente ket impasigurado ni Engr. Dela Peña nga awaten latta dagiti nasao a pagagasan dagiti COVID patients nga agtaud iti LISTT area.
Innayonna a nakasaganan dagiti oxygen ken inaprobaran metten ti lokal a konseho ti pondo para iti panakagatang dagiti agas para kadagiti pasyente ti COVID-19.
Sigun pay kenkuana, namnamaenda a kalpasan ti dua agingga tallo nga aldaw ket maksayan ti kaso ti COVID-19 iti siudad gaputa addan dagiti manamnama a maimbagan.
