BAGUIO CITY – Agingga ita ket awan paylaeng ti umdas a pammalawag ti Department of Energy ken dagiti oil company players mainaig iti dakkel a nagdumaan ti presyo dagiti produkto a petrolyo a mailaklako ditoy lokalidad ken sadiay La Union.
Sigun kenni Baguio City Congressman Marquez Go, dua a committee hearing ti naipatungpalen sadiay Kongreso ngem agingga ita ket awan paylaeng ti napintas a pammalawag dagiti dadakkel a kompanya ti lana iti nasao nga isyu.
Nupay kasta, impanamnamana nga aramidenna ti kabaelanna tapnu maamuan no anya dagiti rason iti nangato a presyo dagiti produkto a petrolyo ditoy lokalidad.
Innayonna nga iti panagsubli ti sesyon ti Kongreso iti sumaruno a tawen ket matalantan manen iti maikatlo a gundaway ti nasao nga isyu a nakapila iti Committee on Energy iti Kamara.
Maipalagip a sumagmamano a motorista ti agrekreklamo gapu iti nangina a krudo ditoy siudad no idilig iti dadduma a lugar.
Nangipatungpal metten ti lokal a konseho ti siudad ti Baguio iti konsultasyon kadagiti gasoline stations ditoy lokalidad ngem kinunada nga agpampannuray laeng met dagitoy iti presyo ti mother company dagitoy a nakabase sadiay Metro Manila.
