Kidkiddawen ita dagiti apektado a residente ti Swamp Area idiay Betag, La Trinidad, Benguet ti pananginspek wenno panangkita dagiti opisyales iti agdama a sitwasyon sadiay tapno maplano ken maiyaramidan iti drainage ti nasao a lugar.
Daytoy ket kalpasan a nalayos gapu iti agtultuloy a panagbayakabak iti tudo.
Sigun iti eksklusibo a pannakiuman ti Bombo Newsteam iti maysa kadagiti residente sadiay, adda ti drainage sadiay a rumuwar idiay Balili River ngem maatap a napullatan daytoy.
Gapu iti dayta, saan nga agsubside a dagus ti danum a maur-urnong nu agtudo wenno ag-bagyo, banag a mangituntunda iti pannakalayos dagiti sumagmamano a pagtaengan wenno asideg sadiay a dumanon metlaeng iti kalsada.
Inlawlawag met daytoy a talaga nga ada ti maurnong a danum sadiay tunggal agtudo ken agbagyo ngem dagos metlaeng daytoy nga agsubside ngem ita ket saanen.
Innayon daytoy a bumayag pay ti layos iti manu nga aldaw.
Sigun pay iti nasao a residente, sigud a garden ti naurnongan ita ti danum. Impeksa daytoy a naiyuman metten ti nasao a pakaseknan ngem saanda paylaeng nga ammu nu anya ti development seknan iti nasao nga isyu.
Kabayatanna, pagdandanagan metlaeng dagitoy ti pannakaada ti dengue sadiay gapu ta ma-stagnant ti danum iti nasao a pasdek. //via Bombo NOveh Organo