BAGUIO CITY – Ididiaya ti lokal a gobyerno ti Baguio City ti cash incentives kadagiti barangay a makaalukoy kadagiti senior citizen nga agparehistro ken agpabakuna kontra COVID-19.
Immunan iti daytoy, nangipaulog ni Mayor Benjamin Magalong iti direktiba kadagiti barangay health authorities ken officials seknan iti panagbirukda iti 11,000 a senior citizens wenno nasursurok pay ngem iti daytoy.
Inwaragawagna a maipaay ti cash incentives inton Setyembre nga aggatad iti P20,000 agingga P50,000 ken consolation prizes kadagiti barangay a mang-allukoy iti 95% manipud iti populasyon ti senior citizen dagitoy nga agparehistro para iti vaccination.
Iti datus ti City Health Services Office, 32,603 ti pakabuklan a bilang dagiti senior citizen a nagparehistro iti siudad no sadinno 30,000 kadagitoy ti naipaayan iti Identification Card.
Manipud iti pakabuklan a bilang dagiti senior citizen a nagparehistro, 1,605 kadagitoy ti nabakunaan iti J&J vaccine ken 19,440 ti nakakompleto iti bakunada iti Sinovac, Astrazeneca, Gamaleya ken Pfizer vaccine.
