BAGUIO CITY – Agtultuloy latta ti panangipaay ti Department of Agriculture (DA) – Cordillera iti tulong pinansyal kadagiti agtartaraken ti baboy iti masakupan ti rehiyon a naapektaran iti panagraira ti African Swine Fever (ASF).
Sigun kenni DA-Cordillera Livestock Program Coordinator Leisley Deligen, dumanonen iti P14.79-M ti naipalusposda a pondo para kadagiti 451 nga agtartaraken ti baboy iti rehion.
Dinakamatna a dumanon met iti 505 nga agtartaraken ti baboy iti rehion ti naapektaran iti outbreak ti ASF bayat nga agarup iti 2,200 ti napapatay a baboy gapu iti ASF virus, pakairamanan dagiti 131 a naikali a baboy.
Innayonna a 311 a barangay manipud iti 16 a munisipyo iti lima a probinsia ti Cordillera ti nakailistaan dagiti kaso ti ASF.
Sigun pay kenni Deligen, maur-uray ita ti panaka-aprobar ti panaka-aramat ti contingency fund ti DA-Cordillera a maipaay kadagiti kanayonan a 186 nga agtartaraken ti baboy nga agnumar ti nasao a tulong-pinansyal.
Dinakamat pay ni Deligen nga adda met latta dagiti dadduma a programa ti DA para kadagiti hog raisers ken mannalon iti rehion kas iti livelihood assistance ken credit assistance a mabalin a pag-utangan dagiti mannalon iti P300,000 agingga P2.7-M para iti pangabaruanan dagitoy.
Innayonna a narugian metten ti swine repopulation kadagiti napili a lugar iti rehion nga immunan a nakailistaan ti kaso ti ASF ngem ita ket naideklaran nga ASF-free areas.
