BAGUIO CITY – Maur-uray paylaeng ti sungbat ti Lepanto Consolidated Mining Company a masarakan sadiay Mankayan, Benguet iti reklamo a saanda a panangited iti retirement benefits dagiti trabahador sadiay.
Immuna iti daytoy, nagkamang iti Bombo Radyo Baguio ni Grazel Yog-a tapnu idanun ti pakaseknan ti amana a nagretiro nga empleyado ti nasao a kompanya.
Sigun kenkuana, nagretiron ti amana kalpasan ti 32 a tawen a panagtrabaho daytoy iti Lepanto Mines ngem manipud idi Agosto agingga Disyembre 2019 ken iti Mayo ita a tawen agingga iti agdama ket awan pay ti impapaay ti kompanya a pensyon daytoy.
Inlawlawagna a ti laeng impaayda ket ti pension ti amana para iti bulan ti Pebrero, Marso ken Abril iti agdama a tawen.
Inyunay-unayna a kasapulan ti amana ti nasao a pensyon nangruna idi naipasidong ti probinsya iti Enhance Community Quarantine ngem awan ti naawatna.
Dinakamatna a saan a nasurot ti katulagan iti nagbaetan ti kompanya ken ti amana a napirmaan sadiay National Labor Relations Commission.
Imbingay pay ni Yog-a nga inturedna ti nagkamang iti istasyon ti Bombo Radyo mainaig iti pakaseknan ti amana ken dagiti dadduma pay a nagretiron nga empleyado ti Lepanto Mines a saan metlaeng a nakaawat iti dadduma a benipisyo dagitoy tapnu adda ti agbalin nga aksyon ti kompanya iti nasao a pakaseknan. //FLOR/editedND
