BAGUIO CITY- Posible a maikalikagum metten ti panangiparang iti Vaccination Card wenno negatibo nga RT PCR ken Antigen test dagiti bisita iti panagturong dagitoy iti masakupan ti probinsia ti Benguet.
Resulta daytoy iti taripnong nga inangay ti Benguet Provincial Inter-agency Task Force idi kalman.
Naituding met a mangipaulog ni Governor Melchor Diclas iti baru nga pammilin mainaig iti nasao a banag.
Impanamnama ti probinsia a maipaka-ammo wenno maiwaragawag daytoy iti publiko sakbayda nga ipatungpal ti pagalagadan no sadinno mangimuntar dagiti kameng ti pulisya iti pakdaar seknan kadagiti dokumento a nasken nga iparang dagiti bisita nga agturong iti probinsia.
Nailawlawag met a babaen iti daytoy ket maipanamnama ti kinatalged dagiti amin nga bisita kontra iti COVID19 ken dadduma a variants ti virus kabayatan ti panagturongda iti probinsia.
Naiyunay-unay pay a maiyaplikar ti pammilin iti aniaman a quarantine status a pagtaudan dagiti bisita nga umuneg iti probinsia ti Benguet.
Nupay kasta, awan pay ti naituding nga aldaw para iti umno nga implementasyon daytoy.
