BAGUIO CITY – Saan a mandatory wenno kapilitan ti panangiparang iti vaccination card dagiti estudyante ken mannursuro kadagiti pagadalan a napalubusan a mangisyangkat ti limitado a face-to-face classes iti rehion Cordillera.
Impetteng daytoy ni Commision on Higher Education (CHED) – Cordillera Regional Director Demetrio Anduyan Jr. iti panakiuman ti Bombo Radyo Baguio.
Nupay kasta, kinunana nga ibalbalakadda ti panagpabakuna dagiti nasao a maseknan para metlaeng iti kinatalged dagitoy kontra iti COVID-19.
Sigun kenkuana, pakabuklan a 3,277 dagiti estudyante a maipasidong iti limited face-to-face class kadagiti 12 a pagadalan iti rehion ken 91% wenno 3,002 kadagitoy ti nakakompleto iti bakuna.
Innayonna a 95% kadagiti mannursuro ken non-teaching personnel kadagiti nasao a pagadalan ti naan-anay met a nabakunaan kontra iti COVID-19.
Inlawlawagna pay a dagiti estudyante ken mannursuro a saan a nagpabakuna a makipaset iti limited face-to-face class ket nagpirma ti waiver.
Innayon pay ni Anduyan a saanda metlaeng a piliten dagiti estudyante a makipaset iti limited face-to-face class no saanda a kayat ken saan a kayat dagiti nagannak dagitoy.
Immuna metten nga impasiguradona ti nainget a panakasurot dagiti pagalagadan iti panakaipalubos dagiti napili a pagadalan a mangisayangkat ti limitado a face-to-face classes.
