Inlawlawag ti Land Transportation Office Cordillera ti maipapan iti pannakaimplementar ti traffic laws ken transportation laws.
Iti interview ti Bombo radyo kenni Land Transportation Cordillera Regional Director Francis Ray Almora, ti mangipatungpal ti transportation laws ket ti LTO bayat nga ipatungpal met dagiti nagduduma a kameng ti ahensya ti Local a gobyerno dagiti traffic laws.
Daytoy ket nakalanad iti National Law a R.A 4136 nu sadinno awan ti LGU a mangkontra iti national law.
Nupay kasta, impeksa pay ti opisyal a rumbeng ti panagkikinaawatan dagiti kameng ti LGU’s ken ti LTO para iti maymaysa a systema maipapan iti panangimplementar kadagiti transport laws ken traffic laws.
Kagiddan dayta, impeksa ti opisyal ti agtultuloy a coordination da kadagiti LGU’s tapno masolbar daytoy nga isyu gapu iti maymaysa a gandat a mangipatungpal iti disiplina para kadagiti drivers.
Kabayatanna, immunan a kinuna ti Baguio City Police Office nga ituloyda ti panangipatungpalda ti Baklas Plaka Operation kas panangsurotda iti city ordinance mainaig iti panaglabsing ti linteg trapiko.
