BAGUIO CITY – Posible a mangipila iti kaskenan a kaso dagiti traders iti La Trinidad Vegetable Trading Post kontra iti lokal a gobyerno ti La Trinidad, Benguet iti kanito a saan pay a marisut ti isyu iti baro a revenue code ti munisipyo.
Imballaag daytoy ni Atty. Simson Baldo, legal officer dagiti nasao a traders kagiddan ti panangiyulitna manen kadagiti basaran no apay a pinitisyonan dagiti traders ti nasao a baro a linteg ti panagbuis sadiay.
Kinunana a saan a naipasidong iti konsultasyon ti nasao a revenue code ken posible a ti nasao a wagas ti panagbuis ket agpaut iti adu manen a tawen.
Innayonna a saan a maliklikan a manayonan ti bilang dagiti negosyante a mangtubngar iti nasao a linteg ti panagbuis.
Sigun pay kenkuana, posible a mawaswas ken mapaawan bileg ti nasao a revenue code ti La Trinidad babaen iti Department of Justice (DOJ).
Maipalagip a nangisumitir iti petisyon dagiti traders sadiay trading post kontra iti baro a revenue code ti La Trinidad sadiay DOJ ken ur-urayenda laengen ti aksion ti nasao nga ahensia.
