BAGUIO CITY – Inkalintegan ti ama ti Tabuk City, Kalinga ti panangipilana iti kaso a panaglabsing iti Republic Act No. 3019 wenno Anti-Graft and Corrupt Practices Act kontra iti bise mayor ti siudad.
Iti interview ti Bombo Radyo Baguio, inyunay-unay ni Mayor Darwin Estrañero a nasken nga ipangruna ni Vice Mayor Bernard Glenn Daoas ti panagserbisyo kadagiti umili saan ket a ti pakaseknan iti pulitika.
Kinunana a ti panangipilana ti kaso kontra iti bise mayor ket paset laeng ti responsibilidadna kas mayor ti siudad ti Tabuk.
Imbinglayna a gapu iti saan a panagpirma ni Vice Mayor Daoas kadagiti resolusyon ken ordinansa nga impasa ti City Council ket naapektaran dagiti proyekto ken programada a paset ti panagrespondeda iti COVID-19 pandemic.
Ddinakamatna a karaman ditoy ti konstruksion ti RT-PCR laboratory, 100-bed capacity isolation unit a mangakomodar kadagiti pasyente a nakaptan ti COVID-19 ken ti panakagatang kadagiti kagawaan para iti panagresponde iti nasao a sakit.
Impetteng ni Mayor Estrañero a no dagus a pinirmaan ni Vice Mayor Daoas dagiti nasao a dokumento ket saan a naitantan dagiti nasao a proyekto ken saan a naapektaran ti anti-COVID-19 program ti lokal a gobyerno ti Tabuk City.
Iti agdama, maur-uray laengen ti desisyon ti Office of the Ombudsman iti nasao a kaso.
