BAGUIO CITY – Iyap-apela dagiti senior citizens ditoy siudad ti Baguio ti panakaikonsidera dagiti pakaseknanda kasaruno ti panangipaulog ni Mayor Benjamin Magalong iti pammilin para iti nainget nga ‘stay-at-home restrictions’ kadagiti umili ti siudad nga agtawen ti 65 nga agpangato.
Iti interview ti Bombo Radyo Baguio kenni Patricio Evangelista, maysa a senior citizen ken lider ti maysa a transport group ditoy Baguio City, kinunana a naglalaok ti reaksion dagiti kakadwana iti nasao a pammilin.
Dinakamatna nga adda dagiti senior citizens iti siudad a napigsa paylaeng iti baet ti tawen dagitoy a 65 nga agpangato nupay inaklonna nga adu met dagiti narisgo iti sakit iti nasao nga edad.
Gapu iti daytoy, isingsingasingda a no mabalin ket madutukan dagiti kapitan dagiti barangay a mangilista ken mangiyendorso kadagiti senior citizens iti masakupanda a mabalin paylaeng a makaruar iti pagtaengan dagitoy.
Impettengna a dagiti kapitan ti maka-ammo no asino kadagiti natataengan iti lugarda ti mabalin a mailaksid iti nasao a pammilin ni Mayor Magalong.
Supsuportaran pay dagiti senior citizens iti lokalidad ti inisyatibo ti nasyonal a gobyerno para iti panakailatang ti umuna nga oras iti panaglukat dagiti pagtagilakuan kas iti groserya para kadagiti senior citizens.
Kinuna ni Evangelista a tarigagayda a maited kadakuada wenno para laeng kadagiti senior citizens ti umuna a maysa wenno dua nga oras iti panaglukat dagiti groserya tapnu saandan a makilapok kadagiti dadduma a kustomer.
Kinunana a napintas no irekomendar daytoy ti City Health Office iti opisina ni Mayor Magalong.
