Impaganetget ni Senador Sherwin Gatchalian a ti panangtaming iti panagngato ti panagsikog dagiti ubbing ket kasapulan ti panangisuro dagiti nagannak ken lokal nga opisial, saan laeng a ti panangipatungpal iti Comprehensive Sexuality Education (CSE).
Kinuna ni Senador Gatchalian a ti panangtaming iti “childhood pregnancy” ket adu ti mabalin a rason iti labes ti sex education.
Dinakamat metlaeng ti nasao nga opisial ti kinapateg ti pannakipaset ti komunidad a kas ti barangay, iti panangtaming kadagiti report ti kinaranggas ken panangabuso.
Ni Gatchalian a chairman ti Senate Basic Education Committee, ket mangitantandudo a masukatan ti CSE iti kurikulum ti Reproductive Health Education, a maitunos iti Responsible Parenthood and Reproductive Health Law.
Impatungpal ti Department of Education (DepEd) ti CSE babaen ti Department Order 31, series of 2018, bayat a ti singasing nga Adolescent Pregnancy Bill ni Senador Risa Hontiveros ket karaman dagiti ti CSE.
Nupay kasta, dadduma a grupo ti nangidatag kadagiti pakaseknan maipapan iti linaon ti CSE, a mangikalintegan a mabalin a saan a maitutop ti sumagmamano a linaon daytoy.
Itay laeng nabiit, naalarma ni Health Secretary Ted Herbosa iti “very high incidence” ti panagsikog dagiti ubbing.
Maibasar iti datos ti Philippine Statistics Authority (PSA) iti tawen 2022, maiparparangarang a 59 manipod iti 100,000 a babbai nga agtawen ti sangapulo ket lima ti nasikogan.
