BAGUIO CITY – Naminpiton a daras a nagiwaras iti family food packs ti lokal a gobyerno ti La Trinidad, Benguet kadagiti umili iti masakupanda a munisipyo a naapektaran iti manarimaan nga Enhanced Community Quarantine.
Iti interview ti Bombo Radyo Baguio, kinuna ni Mayor Romeo Salda a puntiryada ita a maipaayan iti food packs dagiti amin nga stakeholders wenno pamilya sadiay.
Kinunana nga adda met ti nabatbati a pondo ti munisipyo iti Internal Revenue Allotment nga igatangda amin iti bagas tapnu maiwarasan amin iti sag-lima a kilo dagiti babbalay sadiay La Trinidad.
Dinakamatna a panggepda a gumatang iti ad-adu pay a bagas tapnu iti kanito a mailaylayon ti agdama nga Enhanced Community Quarantine gapu iti COVID-19 ket adda ti maiwaras a sag-sangapulo a kilo ti bagas kadagiti amin a babbalay sadiay La Trinidad.
Inaklonna met a marigatanda bassit iti panaggatang kadagiti mainaynayon iti food packs kas kadagiti canned goods, instant noodles ken dadduma pay gaputa saan dagitoy a maipaay dagiti dadakkel a groserya nga adda iti masakupan ti munisipyo.
