BAGUIO CITY – Pinadayawan wenno binigbig manen ni Philippine National Police (PNP) Chief, Police General Debold Sinas dagiti personnel ti Police Regional Office Cordillera (PROCOR) nga idadauluan ni PBGen. R’Win Pagkalinawan.
Iti panagbitlana kas kangrunaan a sangaili iti selebrasyon ti maika-30 a PNP Foundation Day sadiay Camp Dangwa, La Trinidad, Benguet, inladawanna nga “excellent” dagiti amin a kameng ti PROCOR gapu iti agtultuloy a kampanya dagitoy kontra iti iligal a droga iti Rehiyon Cordillera iti baet ti agdama a pandemya.
Kinunana nga iti kaudian nga assessment ken statistics ti PNP ket ribribon a kilo ti marijuana ti nakumpiskar iti nagduduma nga operasyon dagiti otoridad iti rehiyon malaksid pay nga ad-dda a napapigsa ti kampanya iti rehion kontra iti iligal a droga, partikular ti shabu.
Gapu iti daytoy, kinomendaran ni Gen. Sinas ni Gen. Pagkalinawan ken kiniddawna ti panangituloy ti dadaulo ti PROCOR iti napintas a serbisyo daytoy para kadagiti umili tapnu mapunasen ti iligal a droga iti rehiyon.
Innayon pay ti PNP Chief nga agbalbalin nga ehemplo ti PROCOR kadagiti dadduma a Police Regional Offices iti pagilian ken daytoy ita ti inyen-endorsona kadagiti dadduma a rehiyon tapnu tuladenda dagiti sistema ti Cordillera Police.
Maipalagip a naawagan ti PROCOR kas Most Disciplined Cops iti pagilian gapu iti panagbalin dagitoy a disiplinado.
