BAGUIO CITY – Nakasagana latta ti Land Transportation Office (LTO) – Cordillera a mangiwanwan kadagiti motorista kabayatan ti Holy Week.
Iti interview ti Bombo Radyo Baguio, kinuna ni LTO-Cordillera Regional Director Francis Ray Almora nga ipaayda latta ti tulong kadagiti parapasahero a lugan a mapalubusan nga agbiahe kabayatan ti Semana Santa.
Nupay kasta, dinakamatna a posible a saandan nga ituloy ti panagsukimat kadagiti terminal dagiti parapubliko a lugan kas kadagiti bus.
Maipalagip a tinawen a sakbay a madanun ti Semana Santa ket mangisaysayangkat ti LTO-Cordillera ken dadduma pay nga ahensia iti panagsukimat kadagiti terminal dagiti parapasahero a lugan tapnu masigurado ti kinatalged dagiti pasahero ken dagiti agbiahe a lugan.
Kagiddan iti daytoy ket inupayna dagiti kayatda ti agbiahe ita a Semana Santa iti saandan a panagtuloy iti nasao a panggep no ti rantada ket agaliwaksay.
Impalagipna ti balakad ti Department of Health a saanen a panagruar kadagiti pagtaengan ken panagliklik iti panagbiahe kagiddan ti ngumatngato manen a kaso ti COVID-19.
